Rahotanni na bayyana cewar ga dukkan alamu Kungiyar kwallon kafa ta Real Madrid, tana daf da sayen dan wasan Chelsea dan kasar Belgium Eden Hazard bayan da tattaunawa tayi nisa tsakanin kungiyoyin biyu.
Har ila yau tuni dai dan wasan Hazard ya amince da albashin da zai dinga karba idan ya koma.
Tun a shekarar da ta gabata Real Madrid ta nuna sha'awarta na ganin ta dauko dan wasan, domin ya maye mata gurbin dan wasanta Cristiano Ronaldo, wanda ya koma Juventus da taka leda a farkon kakar wasan bana sai dai a lokacin Chelsea ta yi watsi da batun inda tace dan wasan ba na sayarwa bane.
A cikin wasanni 44 da ya bugawa kungiyar a wannan kakar, Hazard ya jefa kwallaye 19 inda ya taimaka aka zura 12, yana da sauran kwantaraki da zai kare a karshen kakar wasan badi.
Wasu rahotanni na bayyana cewar darajar dan wasan ta kai fam miliyan £100 kamar yadda Chelsea take bukata.
Amman a wani bangaren rahotan na cewar har yanzu babu cikakken bayani na kudin da Real Madrid zata biya kan sayen danwasan.
Facebook Forum