Wani kamfanin kasar Rasha ya bada sanarwar cewa zai iya gina wani sabon sansanin bincike na dindindin a kan Wata, wanda kuma zai ci kudi dala miliyan dubu tara da dari uku.
Kamfanin mai suna Lin Industrial, ya zana sabon sansanin wanda yace za a gina a dab da wani dutse mai suna Malapert Mountain a kusa da kuryar kudancin Wata, wanda kuma za a gina shi daki-daki har biyu.
A matakin farko, sansanin zai iya daukar ma'aikata biyu, amma idan aka kammala shi, mutane 4 zasu rika zama a cikinsa.
Tsare-tsaren kamfanin a yanzu sun nuna cewa za a harba rokoki har 37 dauke da kayan aiki kafin a iya kammala aikin gina wannan sansani akan wata, ciki har da rokoki 13 da zasu tafi da kaya mai nauyi.
Kamfanin yace jigilar kaya da gine-ginen farko zasu dauki shekaru biyar, kuma za kammala dukkan aikin ginin sansanin cikin shekaru 10.
Ba a dai san ko kamfanin ya samu kudin gudanar da wannan aikin, ko kuma yadda zai fara shi ba. Amma ganin cewa akwai wasu kamfanoni da kasashen dake shirye-shiryen gudanar da wasu ayyuka a kan Wata, wannan alama ce ta sabuwar sha'awar ci gaba da binciken abu mafi kusa da duniyar bil Adama a wannan bangare na falaki.
