Dan wasan gaba na kungiyar Super Eagles ta Najeriya Odion Ighalo, ya ce rashin sa ‘a ne ya sa ‘yan wasan Algeria suka yi galaba akansu a wasan dab da na karshe na gasar cin kofin nahiyar Afirka da ake yi a Masar.
Algeria ta doke Najeriya da ci 2-1 bayan da suka yi kunnen doki da ci 1-1 a jiya Lahadi.
‘Yan wasan Algeria sun zurawa Najeriya kwallo ta biyu gab da ana shirin kammala wasan.
“Wasan ya yi zafi sosai, kuma mun tafka rashin sa’a a karshen, mun kuma yi rawar gani bayan da aka dawo daga hutun rabin lokaci, ina ganin ba mu cancanci wannan sakamakon ba.” Ighalo ya ce a hirar karshen wasa da ya yi da gidan talbijin na CAF wanda aka wallafa a shafinta na Twitter.
Ya kara da cewa, “amma da ma ita kwallo ta gaji haka, sun samu zura mana kwallo a karshen wasa, wannan ya zama abin koyon darasi a gare mu, yanzu sai mu shiryawa neman gurbi na uku.”
Yanzu Algeria za ta kara ne da Senegal a wasan karshe a ranar Juma'a yayin da Tunisia da Najeriya za su yi fafatawar neman gurbi na uku a ranar Laraba.
Facebook Forum