Matashiya Hafsa Tace Hukumar Samarwa Matasa Ayyuka Ta Koya Mata Hada Mai

Hafsa Abdullahi, wata matashiya da ta samu horon sana’ar hannu a hukumar da take samar da aikin yi ga matasa wato National directorate of employment, ta ce ta koyi yadda ake sarrafa man shafawa, sabulun wanka da wanki, da mace zata iya sarrafawa a gida shekaru uku da suka gabata.

Hafsa dai a yanzu ta na sana’ar yin shampoo, da man shafawa, da man hanci mai zafi wato samfurin rob.

Matashiyar ta ce da taimakon mahaifinta ta fara wannan sana’ar, shi ne ya mara mata baya wajen sayo kayayyakin sarrafa wadannan kayayyakin, bayan ta kammala hada su ya dauka ya kai mata kasuwa inda yake rabawa ‘yan kasuwa domin su sayar.

Ko da ya ke har kawo yanzu ta ce ba ta yi rijistar man na ta ba, takan sayi sitika wadda ta ke likawa a jikin man na ta.

Daga cikin kalubalen da take fuskanta a ta bakinta, sun hada da rashin biya akan kari daga hannun ‘yan kasuwa wadanda ta ke kaiwa domin su sayar. bayan haka ta ce wannan sana’ar na taimaka mata wajen kashe kananan bukatu na kai da ma na kanenta.

Daga karshe ta shawarci mata da su jajirce wajen neman sana’ar hannu domin dauke wa iyayensu kananan bukatu na yau da kullum.

ga karin bayani cikin sauti.